Версия для печати

Гәдиса Агрба Аԥсны жәлар рартист Валери Ҭаниа 70 шықәса ихыҵра идиныҳәалеит

Аԥсны Аҳәынҭқарра акультура аминистр Гәдиса Агрба Аԥсны жәлар рартист, Ҟарачы-Черкесстәи Ареспублика жәлар рартист, Аԥсны зҽаԥсазтәыз Аҳәынҭқарратә жәлар рышәаҳәареи рыкәашареи рансамбль асахьаркыратә напхгаҩы Валери Ҭаниа 70 шықәса ихыҵра идиныҳәалеит:

«Валери Константин-иԥа, шәара зус иазҟазоу, абаҩхатәра злоу акәашаҩ, Аԥсныи уи анҭыҵи еицырдыруа абалетмеистер шәоуп.

Аҟазара иазышәкыз шәыԥсҭазаара иалагӡаны шәара инашәыгӡеит хыԥхьаӡара рацәала ишьахәу апартиақәа, ахореограф иаҳасабала иаԥышәҵеит иналукааша ахореографиатә композициақәа, урҭ рыла ишәырбеиеит жәлар рхореографиа Аԥсны, Ҟарачы-Черкесстәи Ареспублика, иара убас Нхыҵ Кавказгьы.

Абаҩхатәра ду змоу ахореограф, шәара шәхы аашәырԥшит иара убас зеиԥшыҟам арҵаҩы иаҳасабала. Шәара еиҵашәааӡеит имаҷымкәа артист ҿарацәа, ишәырҳаз аԥышәа шәамеигӡакәа урҭ ирзаашәыртит ахореографиатә ҟазара амаӡақәа, ирылашәааӡеит аҟазарахь абзиабара. Шәбаҩхатәра аҳаракыреи, аусурахь ишәымоу агәазыҳәареи алшара шәырҭеит аԥсуа культура ахазынаҭра арбеиара, имариам шәлагалақәеи шәџьабааи ирықәнагоу ахәшьара рыҭара.

Агәра згоит, иахьа напхгара ззыжәуа ахатәы традициақәеи змоу Аԥсныи аҳәаанырцәи еицырдыруа Аҳәынҭқарратә жәлар рышәаҳәареи рыкәашареи рансамбль шәымч шәылша зегь шадышәҵо, хымԥада уи аҭоурых ду иазаашәыртуеит адаҟьа ҿыцқәа.

Ишәзеиӷьасшьоит агәабзиара, аманшәалара, ақәҿиара ҿыцқәа. Шәгәахәтәқәа зегьы шәрыхьӡаратәы Ҳазшаз алшара шәиҭааит».

 
Последнее изменение Вторник, 21 сентября 2021 10:36