Амилаҭтә сахьаҭыхымҭақәа ргалереиа

1963 ш. Аҟәа ақалақь аҟны иаҧҵан Асахьаҭыхымҭақәа ргалереиа Д. И. Гәлиа ихьӡ зху Аҧснытәи аҳәынҭқарратә музеи афилиал аҳасабала. Официаллла агалереиа аартра мҩаҧысит 1964 шықәсазы.

Агалериа афонди аекспозициеи рфонд шьаҭас иаиуит аҳақьым Фишков И. Л. 20-тәи ашықәсқәа рынҵәамҭа инаркны иеизигоз иколлекциа аиҳараӡак. Уи ақалақь ҳамҭас иаиҭеит раҧхьа асахьаркыратә аҧҵамҭақәа ахьыҟаз аҩны ахәҭак. Раҧхьатәи аекспозициа агалереиа иалан аҿыханҵа, аграфика, уи аамҭазтәи аиҳабыратәии абжьаратәии абиҧарақәа ирыҵаркуа асоветтә аҧсуа, аурыс, ақырҭуа сахьаҭыхҩцәа иеиҭаҵуа рыскульптурақәа.

Анаҩстәи ашықәсқәа рзы агалереиа хаҭәаауан аусумҭа ҿыцқәа рыла. Урҭ Аҧсны асахьаҭыхҩцәа есышықәсатәи ҭагалантәии ааҧынратәии рцәыргақәҵақәа рыҟнытә иалалон. Раҧхьатәи 50 усумҭа агалереиа ҳамҭас иаиҭеит И. Л. Фишков ихатәы коллекциаҟнытә. Уи иҧҳа Фишкова Ф. И. агалереиа 30 аҧҵамҭа алҭеит. Аҧсны жәлар рпоет Д. И. Гәлиа иҭаацәа ҳамҭас иарҭеит апоет иҧа ашәҟәыҩҩы Гь. Гәлиа – СССР аҳәынҭқарратә премиа алауреат иусумҭақәа хҧа – «Шьаҿакгьы шьҭахьҟа имцаз», «Аб ипортрет» , «Акәашара».

Асахьаҭыхҩцәа аӡәырҩы иара убас агалереиа иаларҵон иреиҕьыз раҧҵамҭақәа: М. Ешба – апоет Ф. Искандер ипортрет, Ч. Кукулаӡе – Е. Ешба ипортрет, А. Краиниуков – И. Ақырҭаа ипортрет, О. Брендель – «Аҧсыӡкыҩцәа» уҳәа уб.егь. 50-тәи ашықәсқәа рзы иеицырдыруа аҧсуа сахьаҭыхҩы А. К. Чачба-Шервашиӡе Европа дахьыҟазынтәи иҧсадгьыл ахь иааиҭиуеит 500 усумҭа. Асахьаҭыхҩы иааиҭиз аусумҭақәа реиҳарак Қарҭ икыдхалоит, урҭ иахьагьы уа инханы иҟоуп. Иреиҵоу ахәҭа (200 усумҭа раҟара) Аҧсныҟа иаашьҭын 60 –тәи ашықәсқәа рзы, дара иахьа агалереиа афонд аҟны иҟоуп.

Агалереиа афондқәа рыҟны иҟоуп азеижәтәи аҩажәатәи ашәышықәсқәа рынҵәамҭа иаҵанакуа асахьаҭыхҩцәа русумҭақәа. 1994 шықәсазы асахьаҭыхратә галереиа АА Амилаҭтә (АСГ)ҳәа астатус аиуит.

 Иахьа афондқәа рыҟны иҵәахуп ҧшьнызқь инареиҳаны аҿыханҵа, аграфика, иеиҭаҵуа аскульптура, анышәаҧшьлых сахьаркыратә аҧҵамҭақәа. Ара иҟоуп асахьаҭыхҩцәа: Чачба-Шервашиӡе А. К., Петров Б. Л., Контарев В. С, Бубнова В. Д., Гәлиа Г. Д., Ешба М. Е., Брендель О. В., Аҩыӡба Xә. Т., Амҧар Т. А., Џьынџьал 3. К., Иванба В. Е., Хәырхәмал В. И., Гамгиа В. В., Ҷкадуа Иу. В., Ҵәыџьба В. А. уҳәа уб.егь. асахьаҭыхҩцәа русумҭақәа. А. И. Писарчук иуасиаҭ ала иҧшәмаҧҳәыс агалереиа иалалҵеит асахьаҭыхҩы 312 иҿыханҵатәи играфикатәи усумҭа.

Амилаҭтә сахьаҭыхымҭақәа ргалереиа еиҳабыс дамоуп С. Сақаниа. 

 

 

Прочитано 319 раз Последнее изменение Среда, 03 апреля 2019 10:32

О Министерстве

Министерство культуры Республики Абхазия является центральным органом государственного управления, осуществляющим функции по выработке и реализации государственной политики в сфере культуры, искусства, историко-культурного наследия.

Адрес

Республика Абхазия

384900, г.Сухум, ул.Лакоба, 21

Тел: +7(840) 229-75-42

E-mail: mc_ra@mail.ru

Яндекс.Метрика